Formatioun CELVP -Zertifikat fir Sproochecoursë mat berufflecher Zilsetzung
D’Formatioun “Certificat d’enseignement en langues à visée professionnelle” (CELVP) gëtt vum Institut national des langues Luxembourg (INLL) ugebueden.
D’Zil vun der Formatioun ass, d’Participanten dozou auszebilden, fir beruffsorientéiert Sproochecoursen am Beräich vun der Erwuessenebildung ze halen.
D’Formatioun gëtt am „blended learning”-Format ofgehalen: ongeféier 50% vun de Coursë ginn a Form vu Presenzunterrecht ofgehalen. Déi aner 50% vun der Formatioun sinn online. Insgesamt dauert d‘Formatioun 120 Stonnen, verdeelt op dräi Modüller.
D’Presenzcoursë fanne samschdes statt; déi exakt Datumer fannt Dir hei drënner.
Zilgrupp
Dës Formatioun riicht sech u Persounen, déi:
- en en “Diplôme de fin d’études secondaire classique/technique” oder en equivalenten (unerkannten) Diplom hunn;
- den Niveau C1 vum Gemeinsamen Europäesche Referenzkader fir Sproochen am Franséischen an an enger vun deene follgende Sproochen noweise kënnen: Lëtzebuergesch, Däitsch an Englesch;
- sech wëllen am Beräich vu Sproochecoursë mat berufflecher Ausriichtung an der Erwuessenebildung aus- oder weiderbilde loosse wëllen, fir bei de Gemengen oder an engem staatlech subventionéierte Secteur Coursë kënnen ze ginn.
Objektiver vun der Formatioun
Zum Schluss vun der Formatioun
- kennen d’Participanten d’Prinzippie vun der Adragogik a vun der Kommunikativer Didaktik a kënnen dës am Sproochecours mat berufflecher Ausriichtung uwenden;
- beherrschen d’Participanten déi sproochlech, soziolinguistesch an interkulturell Grondlage vun der berufflecher Kommunikatioun;
- kënnen d’Participantë Léiersequenze fir d’Beruffssprooch plangen, ausschaffen an evaluéieren.
Berufflech Perspektiven
De Certificat erméiglecht et, an de Gemengen oder an engem Domän ze enseignéieren, dee vum Staat subventionéiert gëtt.
Fir beim INLL ze postuléieren, ass e Masterdiplom an der Sprooch, déi een enseignéiere wëll, erfuerderlech.
D’Unerkennung vun de Sproochen
D’Formatioun gëtt ausschliisslech op Franséisch gehalen. D’Gesetz verlaangt awer, en C-Niveau an zwou Sproochen nozeweisen (article 11, loi du 8 mars 2023 portant création de l’Institut national des langues Luxembourg).
Akzeptéiert Certificaten:
- eng international Zertifizéierung (DELF-DALF, Cambridge, Goethe, asw.)
- en Universitéitsdiplom an enger vun de gefuerderte Sproochen
Fir d’Mammesprooch geet eng Déclaration sur l’honneur duer.
Um Enn vun der Informatiounsreunioun gëtt e mëndlechen Entretien an e schrëftlechen Test organiséiert, fir ze iwwerpréiwen, ob Dir iwwer déi néideg Sproochkompetenze verfüügt, fir d’Formatioun op Franséisch ze suivéieren.
Inhalter vun der Formatioun
D’Formatioun ëmfaasst dräi Modülle mat am Ganzen 120 Stonne Cours (Presenzunterrecht an Online-Deel):
- Modüll 1: Didaktik vum Sproochecours mat berufflecher Ausriichtung (60 Stonnen);
- Modüll 2: Sprooch fir de Beruff (30 Stonnen);
- Modüll 3: Soziolinguistik (30 Stonnen).
En obligatoresche Stage am INLL (2 x 4 Stonnen) ass virgesinn, mat Fokus op d’Observatioun an déi praktesch Ëmsetzung vum Lëtzebuergeschen oder Franséischen als Friemsprooch am berufflechen Ëmfeld.
Programm vun der Formatioun
D’Formatioun ëmfaasst:
- Eenzel- a Gruppenaarbechten;
- theoreetesch Inhalter (Sproochenunterrecht fir Erwuessener mat Fokus op de beruffleche Kontext);
- praktesch Übungen, fir d‘Theorie an d’Praxis ëmzesetzen (z. B. d’Erstelle vu Léiermaterialien).
Modüll 1 – Didaktik (60 Stonnen)
Zum Schluss vun dësem Modüll kënnt Dir
- Programmer an Unterrechtssequenze plangen;
- e Syllabus a Coursen ausschaffen;
- Aktivitéite mat verschiddene Methoden a Konzepter entwéckelen;
- verschidden Technike fir d’Gestioun vun der Klass uwenden;
- ënnerschiddlech Bewäertungsmethoden ausschaffen a Feedback ginn.
Modüll 2 – Beruffssprooch (30 Stonnen)
Zum Schluss vun dësem Modüll kënnt Dir
- d’Beruffssprooch definéieren an hir Haaptcharakteristike erklären;
- déi sproochlech Aktivitéiten a Kompetenzen u berufflech Situatiounen upassen;
- Sproochaktiounen an Ausdrocksmëttel uwenden, fir kommunikativ Ziler ze erreechen a professionell Aufgaben ze erfëllen.
Modüll 3 – Soziolinguistik (30 Stonnen)
Zum Schluss vun dësem Modüll kënnt Dir
- d’Soziolinguistik am Kontext vum beruffleche Sproochenunterrecht situéieren;
- Interkulturell Dimensiounen a Mediatiounsaspekter an d’Erwuessenebildung integréieren.
Zäitplang
- Remise vun den Dossieren:
- Vun e Méindeg, dem 08.06.2026 bis e Freideg, den 11.09.2026
- Informatiounsreunioun vun de Kandidat*innen, deenen hir Dossieren zeréckbehale goufen:
- Méindeg, den 13.07.2026, 18:00-19:00
- Mëttwoch, de 16.09.2026, 18.00-19:00
- Formatiounen am presentiel (samschdes tëscht 9:00 an 12:00 Auer an/oder tëscht 13:00 a 16:00 Auer, Ännerunge virbehalen):
- 26.09.2026
- 24.10.2026
- 14.11.2026
- 05.12.2026
- 20.02.2027
- 13.03.2027
- 17.04.2027
- 12.06.2027
Bewäertung an Zertifikat
D’Bewäertung gëtt am Laf vun der ganzer Formatioun gemaach. Si setzt sech aus enger kontinuéierlecher Evaluatioun vu schrëftlechen a mëndlechen Tester, esouwéi aus der Bewäertung vun engem Projet zesummen.
Äert perséinlecht Engagement, esouwéi äert aktiivt an autonoomt Matschaffe sinn d’Viraussetzung, fir d’Formatioun mat Succès ofzeschléissen.
Zum Schluss kréien d‘Kandidaten a Kandidatinnen, déi op d’mannst 60 % vun de Gesamtpunkte kréien, den Zertifikat fir Sproochecoursë mat berufflecher Zilsetzung.
Aschreiwung
D’Aschreiwung muss follgend Dokumenter enthalen:
- den ausgefëllten Aschreiwungsformulaire;
- eng Kopie vum “Diplôme de fin d’études secondaire classique/technique” oder engem equivalenten (unerkannten) Diplom;
- e Liewenslaf (CV);
- en Nowéis vum Niveau C1 am Franséischen an an enger vun deene follgende Sproochen: Lëtzebuergesch, Däitsch an Englesch;
- eng Kopie vun engem gëltegen Identitéitsdokument.
Käschte fir d’Formatioun pro Joer: 200 €.
Déi nächst Aschreiwunge ginn am Juni 2027 op.
Member vun:
